Feb
03
2013
--

Leccións para facer un bo chasco (1)

Os mellores chasos tan gravados nos recordos dxs máis maiores, igual que as antroidadas máis bravasl.  O resumo que fan do antroido actual e da vida en xeral senténciano con “a xente de antes era máis adevertida”. Por iso teimamos en recuperar esa “adiversión” que reinaba no kaos antroideiro para poñer de novo o mundo ao revés! Para aprender… o único que hai que facer é escoitalxs.

Desta volta falan dos “chascos” (termo empregado sobre todo por Encrobas, Meirama e nalgunha casa da parroquia de Cerceda) ou das “antroidadas” (empregado no resto do concello e na comarca de Ordes e de Bergantiños).

 

Facerlle un chasco a alguén é ben sinxelo…

-Preguntáronme por ti!
+E quen?!
-O Antroooido, Choqueeeeeeeeeeiro!

Con todo, a reinvención dos chascos queda na vosa man… e podedes ser bravxs!

Written by aclucernacerceda in: ACTIVIDADES,ANTROIDO,chascos_entroido | Etiquetas: , , ,
Xan
07
2013
--

Lucerna non morre… muta!

O cheiro a antroido danos folgos e mudamos de directiva para seguir espallando a cultura na busca dunha veciñanza activa. A nova Xunta Directiva da asociación, escollida en Asemblea Xeral Ordinaria, estará presidida a partir de agora por Sabrina Gestal Queijas, na vicepresidencia Uxía Castro, de secretario Carlos Gende, o tesoureiro elixido foi José Antonio Gende e xs vogais David Mosquera e Rocío Fernández. Combínase así a experiencia de membros que xa formaban parte da Asociación desde facía tempo coas achegas de persoas recén aterradas en Lucerna. Destaca tamén a ampla presenza da mocidade, con interese en que continúe no concello o movemento asociativo e as actividades culturais que fomenten na cidadanía a creación dunha conciencia crítica e ligadas á reinvención das tradicións do concello e do país.

Nesa liña xa comezamos a traballar na do Antroido 2013, que este ano se celebrará o sábado 16 de febreiro. Como vén sendo costume, a Asociación Cultural Lucerna encargarase de organizar o Antroido da veciñanza, un dos eventos que máis público de todas as idades reúne no concello. Desde Lucerna chamamos a toda a vila a colaborar, pois consideramos que é unha das citas máis valiosas do concello e que debemos conservar porque reúne no Campo da Feira desde a mocidade até as persoas máis maiores dentro dun ambiente de xolda e que combina a cultura popular e as tradicións coa creatividade e a crítica da actualidade.

Así mesmo, na folla de ruta da Asociación Cultural Lucerna xa hai unha presada de actividades pensadas para levar a cabo unha vez enterrado o Antroido. Na Asemblea Xeral amosouse a intención de realizar de novo o Festival, a creación dun Banco de Saberes, obradoiros audiovisuais, ciclos de proxeccións, campionato de futbolín, un bingo…

Con todo, aínda que a actividade da asociación xa estea en marcha de cara a este novo ano, Lucerna segue aberta á incorporación de novas socias e socios, ás propostas da xente que queira achegarse ao movemento asociativo do concello e a calquera idea da veciñanza de Cerceda e da comarca.

Animádevos e convertédevos en lucerneirxs! Podedes atopar máis información neste mesmo blogue, no noso facebook ou enviándonos un correo-e a aclucerna@gmail.com

…e que a cultura continúe espallándose sen censura!

 

Written by aclucernacerceda in: OUTROS |
Nov
01
2012
--

COCHIKEIROS XA ESTÁN DE NOVO AQUÍ. “Pois podían ter quedado na casa”

Xa está aquí de novo unha das sorpresas billardeiras da tempada pasada na Conferencia Noroeste da Liga Nacional de Billarda. Un equipo que sempre sorprende en cada xornada, que uns días crea momentos de euforia e noutros decepciona e que é capaz de crear tensión na liga e de manter a ilusión na afección ata as últimas xornadas para despois cagala do xeito máis incríbel. Un equipo que despois de non estar clasificado para os play off nacional de Conxo consegue de carambola que todos os palanadores e todas as palanadoras, tamén do equipo filial, estivesen clasificados para a gran final. Fito histórico que un equipo ao completo no seu primeiro ano na liga poidese acudir á gran final da liga de billarda. Yuuuupi

E como fan en todos os equipos cando as cousas non van ben ou poderían ir mellor sempre lembran as grandes xestas para esquecer o momento presente. Lembremos pois como foi a crónica dese día: “A inesperada sorpresa da convocatoria para a final de Conxo colleu xa baixos de forma e sen adestrar ao equipo. Xa non había tempo para acadar a condición física que se precisa para un deporte coma este. Que se podía facer para dar unha boa imaxe coma equipo e non pagar a novatada? Velaquí a pregunta para a que a 24 horas da final o equipo técnico formado por Boquete, Viqueira e Berdillo estaba a debullar unha resposta. Así dende o “txoko do garito” comezouse a elaborar unha estratexia coa cal poder arrasar na final. Nunha longa lista comezaron a anotarse os ingredientes necesarios, foise á súa busca a onde fixese falta e… mans á masa. A clave do éxito estaría nas empanadillas feitas con recheo do mais diverso e no lacón que mentres tanto ía asándose no forno.

Pero a xogada clave, coa cal despistar ao contrario, viría da man de Isma que insistía en que el facía a tortilla. E foi esa tortilla, elaborada iso si, pola nai del, a que despois dunha dura competición gañou o concurso á mellor tortilla non española pola que lle adxudicaron o Millo Corvo, primeiro gran premio que vai parar ás vitrinas do salón de trofeos do equipo. Así pois, con tan exquisitos manxares estaban xa a arrasar e sen suar nada. E sen dúbida tan brillante triunfo había que celebralo cun licor café que estaba ben fresquiño e que chegou a ben pouco. E con todos estes prolegómenos cremos que xa non fai falta dicir nada máis de como transcorreu o resto da competición agás que viñeron de volta para a casa cos pés ben enlameados”.

No segundo domingo do mes de Outono comezaba un ano máis a liga na Conferencia Noroeste. A 1ª xornada comezou sen saber aínda quen formaría parte do plantel do equipo pois moitos palanadores e palanadoras da tempada pasada aínda non asinaran os novos contratos seguramente agardando posíbeis fichaxes por outras franquicias. Xa se sabe que os cartos mércano todo e por aquí non che hai moito ou gástase noutros vicios. Deste xeito a quen madrugou para vir xogar á pista de Castelo (Culleredo) fíxoselle ficha para o “Equipo A”.

A quen non veu sempre lle quedará o filial. Deste xeito, nunha despexada e ventoeira mañá presentáronse Antón, Viqueira, Alberte e Berdillo aínda que por algún tivesen que agardar un bo anaco.

 

 

Novas fichaxes veñen a reforzar este ano o equipo. Por un lado Sonia, fichaxe do “ollador” Alberte que percorreu as pistas (de baile) do país na busca de novos talentos. E Dani, que nun principio tentou formar un equipo con xente de Carral e a quen tiveron que chamar para que se animase a vir xogar e converterse así no primeiro palanador “non local” que forma parte da plantilla, aínda que é como se fose da casa.

No aspecto deportivo foi unha xornada normaliña na que só pasaron de rolda Antón, Alberte e Viqueira, este último que a pesares de non ter collido o palán en todo o verán, ao igual que os demais, vese que ten un gran “feeling” coa madeira e pasou a primeira eliminatoria conseguindo ser o máis destacado do equipo. Antón xa non sabía onde deixara o palán durante todo o verán ata que chegou Alberte e abriu o maleteiro do coche e coma bo amigo tínallo alí gardado. Dani só chegou para desputar a última carreira polo que pouco puido demostrar a súa valía e Sonia callou unha boa actuación ao conseguir completar unha carreira. Berdillo erguérase cedo para facer no taller unha nova billarda coa que quería gañar o aberto pero á hora de competir andaba durmido ou durmindo, para o caso é o mesmo. E todo isto completado con golpes no aire, billardas que xa non se levantan, que arrincan cara atrás, que baten no teito ou outras que van parar ao varal contrario, todo un espectáculo en vivo!

No seguinte domingo a 2ª xornada, que nun principio ía disputarse no campo da festa de Meirama, tivo que buscar acubillo no pavillón do Piñeiro por mor da choiva. Unha das pistas máis rápidas do circuíto nacional, apta para grandes mestres dos varados e para quen non o é tanto pero ten moita sorte. E isto último sucedeulle ao equipo nesta xornada na que asinou o mellor rexistro de varados en toda a súa aínda curta pero intensa historia. A velocidade supersónica coa que saían as billardas ao seren golpeadas polos paláns e tocaban na escorregadiza pista permitiron que se tivesen feito moitos varados e gozar dun emocionante aberto. Tamén se puido pasar unha divertida mañá cos golpes estratosféricos nos que insistía Berdillo e cos que parecía querer atravesar o teito do pavillón, que de facelo ben seguro que tería estabelecido un record de caída libre de billarda, e quen só despois de ter corrixido a traxectoria da mesma conseguía clasificarse para a fase de eliminatorias.

 

E Mila apuntábase nesta xornada a reforzar ao equipo e a facer espabilar a algúns palanadores que nesta ocasión e xogando na casa non viñan moi concentrados e non atinaban coa billarda, e non foi porque tivesen que cambiar de pista a última hora ou fosen mellores sobre asfalto. Sonia vai progresando e fíxoo tan ben ou mellor ca Alberte, o que non é novidade. Antón tiña despois un xantar e andaba con presa e parecía que tamén con fame. E Dani era dos que máis madrugaron ese día e dos que máis ganas tiña de facelo ben; e non lle foi mal, pouquiño a pouco.

Pero nesta xornada o equipo estaba conxurado para facer historia, petar na pista e meter o medo no corpo ao resto de competidores. Por primeira vez un palanador chega a unha final dun Aberto, e non podía ser outro que Viqueira, o único que sente as billardas como parte da súa vida, e iso que este ano non estivo a facer novas billardas senón que anda a reciclar as que quedaron da tempada pasada; a iso chámaselle sustentabilidade billardeira. E tan relaxado estaba que ata tiña tempo para debutar nunha nova faceta, a de árbitro.

 

Pero despois de eliminar a anteriores gañadores de abertos na final atopouse cun intratábel Lois de Gharaboto. O mellor palanador do equipo na pasada tempada comeza a marcar diferencias no mesmo, a sacar peito e a mostrarse coma un firme candidato a gañar a liga, por iso dende a directiva xa comezaron as negociacións para a renovación do seu contrato por se algún outro equipo comeza a sacar a billeteira.

EXCURSIÓN BILLARDEIRA A FUME DE CAROZO.

O parón entre xornadas na conferencia é motivo para que algún palanador ousado vaia a lucirse a un aberto doutra conferencia. Así este pasado sábado Viqueira e Berdillo colleron o coche, despois dun apurado café, e arrincaron botando lume cara a pista da Madalena en Castrofeito (O Pino) sen ter idea de onde quedaba pero chegando a tempo ao aberto que se ía desputar alí. Pero xa se sabe que preguntando chégase a calquer lado, se non te mandan polo camiño que non é. Mais a pesar do doentes que ían a fría tarde destemplounos unha vez que chegaron pois ata as mán lles doían cando batían co palán. Unha acción lóstrego para volver tal e como foron, iso si máis amodo, e non facer nada mais que caer nas pozas e escachar a billarda.

Agradecer a todos e a todas que durante a pasada tempada estivestes a seguir con paixón os vaivéns deste equipo e a crear a mellor afección que poida ter aínda que non se vos vise o pelo por ningunha bancada. Por iso este ano queremos seguir aquí dando a nota e que vós contribuades tamén a agrandar a lenda deste equipo. De nada!

Written by aclucernacerceda in: BILLARDA |
Mai
24
2012
--

COCHIKEIROS: O FINAL DUN SOÑO REMATA NUN PESADELO.

Ao final non puido ser, ou mellor dito, non foi pero puido ser se non fose porque…. A continuación analizaremos as causas do desastre.

O declive comeza na 10ª xornada disputada a carón da Fábrica de Tabacos. Era moita a euforia coa que chegaban tras recortar puntos na anterior xornada cos Filloas de Sangue e tamén que segundo os cálculos matemáticos da “casio” aínda era posíbel ser campións da conferencia. Pobres ilusos!. Todo parecía favorábel pois por segunda vez na liga acudía o equipo ao completo polo que as probabilidades de acadar unha boa puntuación eran maiores. Ou viñan fumados ou sentoulles mal o colacao de pola mañá pois de decepcionante e patética podería cualificarse a actuación dese día, tan só algo maquillada por Viqueira e Isma pois foron os únicos que pasaron de rolda. Xornada na que tamén os únicos dous palanadores do equipo filial, os canteiráns Boquete e Martiño, fixérono mellor que calquera dos outros, poñendo en evidencia aos galácticos e reivindicando así un posto no equipo para a vindeira tempada. De destacar e de nota é a progresión de Cochikeiros B nesta recta final da liga que foi inversamente proporcional á do “equipo de moda da liga”. Como anécdota, de volta para a casa Berdillo, que fixo unha moi lamentable actuación, tivo que ir no coche cos catro palanadores que conseguiran a mellor puntuación da xornada polo que lle tocou pagar as cervexas e os callos, ademais de sufrir a humillación de ser o que peor o fixera e mesmo quixeron abandonalo polo camiño.

A culpa foi de Zënzar!!, era a escusa mais escoitada días despois da 11ª xornada que supuxo o ocaso definitivo de Cochikeiros na liga e disputada en Meixón Frío (Oleiros) nun domingo pola mañá, nunha pista con malos recordos pois foi onde o equipo acadara a súa peor puntuación de toda a liga. E como non, a historia volveu a repetirse. O sábado á noite, na véspera desta xornada, os palanadores do equipo, si todiños, non faltaba ningún, foron de movida á discoteca Josfer do Mesón do Bento na que o grupo decano do rock galego, a ver se estes palanadores botan tantos anos dándolle á billarda, presentaba o seu novo disco. E a noite alongouse pero todos comprometíanse a erguerse pola mañá e ir xogar. Eu mañá vou!!, contade comigo!! dicían algúns mentres lle mandaban un grolo longo ao cubata. E chegou a mañá…. e cumpríronse os peores presaxios e só un único palanador demostrou profesionalidade e compromiso co equipo. E iso que desde o escenario o palanador afeccionado Bocixa desexáralles sorte e animou ao equipo, claro que para que gañaran ao día seguinte, non para que fosen á barra a pedir outros gintonics. Insólito, tan só Viqueira, o mellor palanador do equipo, foi defender o que xa era un equipo en vertixinosa caída libre. E tivo que suar, pero a súa fe en que se podía obrar o milagre converteuno no salvador dun equipo ao que deste xeito aínda lle quedaba unha última xornada para seguir sufrindo. Acadou as semifinais e tan só un palanador de Bateas foi quen de cortarlle o camiño cara á final e poñendo o broche a unha xornada, para el moi boa, cun magnífico varado. Aguantou estoicamente a presión dos Xarutos conseguindo manter ao equipo na clasificación pero xa con tan só un punto de vantaxe para afrontar a última xornada.

E desde Cochikeiros B si que houbo un maior compromiso deportivo e por iso Boquete e Mila, ao mesmo tempo que xogaban, estiveron a animar a Viqueira nesa difícil tarefa de “facer o traballo de oito persoas”. Berdillo e Carlinhos xa avisaran de que non poderían ir por compromisos familiares aínda que non probas polo que se sospeita que foi inventado como escusa para quedar durmindo pola mañá. Adrián, o “dillei de moda”, dixo que como tiña unha sesión afterhours despois do concerto que tampouco contaran con el. De Isma, no comment!. Alberte e Antón ou Antón e Alberte, tanto monta monta tanto, non fixeron comentarios ao respecto do seu comportamento. Debeulles durar que de Alberte non se soubo nada ata a última xornada da liga e Antón aínda segue desaparecido. Sospeitase dun posíbel secuestro con motivos deportivos argallado por algún equipo, pero que non pidan rescate que non damos un peso por el. E por último de Zaida, que non estivo nin no concerto nin no aberto, aínda estamos a agardar as explicacións de Alberte.

 

E chegou a 12ª xornada, a derradeira desta tempada e disputada nun campo de herba artificial a carón da Torre de Hercules. Unha xornada de infarto na que tan só tres palanadores, Viqueira, Berdillo e Alberte foron defender ese punto de diferencia cos Xarutos. Pero a pouca concentración, o desánimo e a falta de adestramento, xunto cun terreo de xogo distinto para o que non viñan preparados fisicamente, fixeron deste día un suplicio cun fatídico final. A Berdillo custáballe bater a billarda e firmaba o seu peor rexistro, nunha primeira rolda, de toda a tempada. Viqueira non conseguía pasar de rolda por un só punto polo que practicamente estaba perdida clasificación por equipos para Conxo. Aínda que parecera incríbel todo dependía xa de Alberte que nesta xornada emendou as súas anteriores condutas e realizou un magnífico aberto ao pasar de rolda, enfrontándose despois nun tenso dolo, que perdería, contra David Fontán e no que estaba en xogo un punto que polo menos daría o empate cos Xarutos na clasificación final. Os palanadores recibiron as condolencias de Mila, única palanadora do filial que acudiu a xogar, e que acadaría a clasificación para Conxo na categoría feminina.

Pero a baixada no rendemento de algún palanador do equipo e as baixas nas dúas últimas xornada fan que se disparasen as alarmas e se crean sospeitas de que non é algo casual. Igual hai quen tiña asinado un pre-contrato para a vindeira tempada con algún equipo rival. Sospeitosa era a presencia no terreo de xogo dun maletín que dicían que era para levar billardas pero que non se descartaba que tivese dobre fondo cheo de billetes. Tamén destacable foi que os rivais amosasen un extraordinario nivel de xogo sobre todo nos enfrontamentos directos… ou mais ben sería que os palanadores do equipo amosaban un extraordinario mal nivel de xogo… sospeitoso igualmente!. Dende logo xa se están a investigar todas estas cousas. Así mesmo estanse a analizar todas as actas para ver se hai algún erro nas mesmas que poidan dar o punto necesario para o equipo. Xa vedes, queren gañar nos despachos o que non foron capaces de gañar no campo. Patético!.

 

Deste xeito Cochikeiros quedan terceiros na clasificación e non conseguen ser o mellor equipo de billarda do mundo mundial pero sempre lles quedará ir polo mundo loitando polas boas causas e liberando aos bocadillos das bocas famentas.

A pesares de todo, acadaron o pasaporte para este domingo 27 de maio disputar o play off nacional en Conxo:

  • Individuais: Viqueira, Berdillo e Antón.
  • Varados: Isma.
  • Feminina: Zaida e Mila.

 

Viqueira converteuse na revelación da liga ao ser o terceiro mellor palanador da Conferencia Noroeste. Botamos de menos que este dato non o tivese en conta a organización da Gala do Deporte da comarca pois ben merecido que tiña un premio. Pero xa se sabe que a aqueles deportes e equipos auto-xestionados, que se manteñen sen ningún tipo de subvención e que non deben favores a ninguén, parecen non ter cabida nestes actos que só serven para o lucimento dos políticos. A promoción do deporte faise espallando o mesmo entre amizades e veciñanza e non con copas e medallas de latón nin feixes de flores, polo que Cochikeiros disputarán proximamente un aberto amigábel cun equipo de xente de Carral e do Xalo que ben seguro na vindeira tempada formarán parte como palanadores e palanadoras da LNB.

 

MECAGHO NOS COCHIKEIROS DE CRISTO!!

Written by aclucernacerceda in: OUTROS |
Mar
31
2012
--

COCHIKEIROS VOLVEN A PERDER: ERA BOA, VILABOA!

Cochikeiros venceron a todos o elementos nesta fin de semana para poder estar presentes na pista de Castro-Laxe, ao lado de Vilaboa, que xa se lles dera ben na anterior xornada alí disputada. Nin o anacrónico cambio de hora que só serviu para que gastasen aínda máis enerxía nesta xornada, nin o horario matinal que sempre soe xogar na contra do equipo, nin a atraso nun cuarto de hora para o comezo do Aberto foron obstáculos suficientes para que os membros do equipo puidesen estar presentes nesta 9ª xornada, polo menos en corpo e aínda que pareza inverosímil tamén en mente, iso si, chegando tarde coma de costume e dando a aliñación polo móbil desde o coche.

Os palanadores e palanadoras do equipo tras brillar pouco como estrelas no pasado All Star miraron ao ceo nesta fin de semana, algún nunha revista mentres lle cortaban o pelo, para ver o que os astros lles deparaban para esta xornada. Parece que o fenómeno astrolóxico da conxunción de Venus, a Lúa e Xúpiter formando unha aliñación perfecta predicíalles que esta podía ser unha boa xornada billardeira polo que se conxuraron para dalo todo coma nunca este domingo e ofrecer o espectáculo astrolóxico que non deran no pavillón do Piñeiro.

E moito espectáculo si que houbo na pista, e xa dende o primeiro minuto. Comezábase a xogar, o árbitro chamaba por Antón que aínda non se atopaba presente e cando ían descualificalo por incomparecencia chega sachando co coche, sae del sen nin sequera coller as chaves e salta á pista berrando “aquí estou”. Pero nisto o árbitro sóltalle: “a onde vas con ese tranco?”, non é que chegase empalmado polo efecto dunha “tumescencia peneal nocturna” senón que traía na man un tremendo palán non regulamentario que mercara, ou máis ben lle venderan, na sección de deportes de “El Timo Inglés” pero que o dependente fora buscar á sección de ferretería. Debeu ser do rebote que colleu que conseguiu pasar á rolda final e ademais cun palán prestado.

Pero Boquete tamén se subiu ao carro do espectáculo. Xa lle custaba saír da zona de saque, e iso que o intentaba de todos os xeitos posíbeis, pero nunha desas golpea a billarda para deixala preto do varal pero cara a un lateral. E que mellor maneira de rematar o mal xogo que facendo un mate digno de All Star: dálle á billarda, golpéalle e cando esta está diante do varal lánzase en prancha e voando bátelle outra vez pero non consegue metela pois quédalle a uns centímetros da liña. Mágoa que as cámaras non tivesen captado ese momento para puidésedes gozar del. Lamentamos que tanto esforzo fose en balde e non pasase de rolda.

 

 

Aínda que custe crelo, o mellor palanador do equipo, aclaremos, na rolda de grupos, foi Alberte o rei de Xermar” que xa chegaba pola mañá dicindo que ía arrasar. Pero durante o descanso, sentado no seu trono e acompañado polo seu inseparábel lacaio Antón, estivo a alardear do seu xogo e das calidades aerodinámicas da súa billarda polo que tanta soberbia lle xogou unha mala pasada e despois non conseguiu pasar da primeira eliminatoria.

 

 

Por segunda vez consecutiva Berdillo conseguía chegar aos cuartos de final, que parecen ser unha barreira difícil de superar para o equipo. E fíxoo cunha billarda que xa estaba toda esnaquizada por diante, e só de xogar ese día, o que é indicativo do “boísimo” material co que xoga o equipo, pero que se resistía a cambiar. Iso si, o capitán do equipo antes de ser eliminado e co ánimo de todo o equipo ao son de alcalde, alcalde!! fixo pasar a billarda polo medio de dúas cerchas da cuberta e case fai varado. Xa sería moito!!.

 

E Viqueira conseguía “in extremis” acompañar aos outros tres magníficos á rolda final e acadar o obxectivo do equipo de meter a catro palanadores en oitavos de final. Quedárase durmido e tivo que erguerse á presa pola mañá polo que aínda debía estar durmindo. Agardemos que non se desinche nestas tres últimas xornadas e se manteña na clasificación para conseguir ir á final de Conxo.

 

 

Nesta xornada na que non puido participar Zaida, que como se confíe moito non se vai clasificar para os play-off, a representación feminina correu a cargo de Mila, a nova palanadora do equipo filial, que na súa primeira participación na liga deixou todo o seu xenio na pista aínda que neste día debía ter pouco polo que non pasou da primeira rolda.

 

 

Quen si conseguiu pasar da primeira rolda foi outro debutante do filial, Mosquera, acadando un fito histórico para Cochikeiros B. Moi boas sensacións está a dar este rapaz que xa demostrara un enorme potencial no All Star. Pero o segredo dos seus poderes, coma en todos os superheroes, está no traxe: e que poñer o chándal do Encrobas C. F. para xogar á billarda fai a un impabatíbel ademais de dar categoría e clase.

Carlinhos como non se afeite calquera día nun deses magníficos golpes quédalle a billarda enredada na barba. Estaba encadrado nun grupo bastante cómodo a aínda así non pasou de rolda porque se debeu de acomodar demais. En toda a liga só conseguiu unha vez pasar a oitavos de final e foi precisamente en Cerceda para así non quedar mal diante da veciñanza.

 

 

O que parece estar xa desposuído desa áurea que acadara no aberto disputado en Cerceda cando acadara a semifinal é Isma. Foi o último de todo e parece que lle afectou moito, pero non sería de estrañar que na vindeira xornada rexurda das cinzas. No que andan moi escasos no equipo é de varados pois lembremos que Isma é o que máis varados leva feito do equipo e disto xa fai varias xornadas atrás.

Pero o mellor da xornada foi o terceiro tempo disputado nun sport-bar de Vilaboa entre cervexas e tapas de callos que ben seguro viñan mellor antes de xogar para coller “forza no cu”.

 

CHASCO BILLARDEIRO.

Pero nesta 9ª xornada veunos ao recordo a outra disputada nesta mesma pista. Dende Cochikeiros tamén se quixo participar dos chascos do Antroido de Cerceda e que mellor maneira de facelo que dando unha falsa crónica do que fora a 7ª xornada da liga. No seu momento destacábamos con toda a pompa a suposta vitoria do palanador Viqueira nun Aberto da liga pero a noticia sería certa se a cada frase lle engadísemos un “case”. Aínda que obtivo un bo resultado, pois conseguiu chegar á semifinal, deixou a todo o equipo cun sabor agridoce xa que se agardaba unha vitoria despois dos bos resultados acadados polo equipo nas últimas xornadas. Pero con isto conseguiuse que Viqueira, o palanador antigaláctico, o palanador discreto ao que non lle gusta a popularidade e que se afasta do flashes das cámaras fose portada dos medios de comunicación deportivos do país e como non podía ser doutro xeito tamén foi nova destacada no blog referencial da billarda http://ovaral.blogspot.com/2012/02/lnb-lume-de-viqueira.html.

 

Nonqueríamos que a afección se desanimase diante dos vindeiros posibles malos resultados e que todas e todos acabasen asumindo que o equipo tocara teito, pois xa despois na 8ª xornada disputada na Sardiñeira o equipo tivo unha desastrosa actuación na que tan só Berdillo e Zaida pasaron de rolda e Viqueira foi quen o fixo peor, posiblemente debido ao estrés mediático de toda a semana. Esa xornada só destacou polo debut de Martiño como novo palanador do equipo filial.

 

 

Así a suposta vitoria fixo estalar de ledicia a unha afección que xa viña de gozar coas anteriores xornadas disputadas. Este chasco serviu para levantar o ánimo e o apoio ao equipo que agardemos despois desta brincadeira aínda continúe. E como diría Chús, a nova palanadora e eterna debutante na liga, “arriba esa pasión”.

 

 

Written by aclucernacerceda in: BILLARDA |
Mar
20
2012
1

BILLARDA ALL STAR 2012: ESTRELAS E ESTRELAD@S.

O pasado domingo tivo lugar no Pavillón do Piñeiro un acontecemento que situou ao concello no epicentro mundial da billarda. Un evento que paralizou toda actividade e que despertou un interese nunca antes visto neste deporte, colapsando os accesos ao Piñeiro e quedando pequeno o inmenso aparcadoiro. Mesmo o comezo do partido de fútbol do Cerceda tivo que demorarse ata que rematara o lanzamento de foguetes que pola tarde anunciaban o inicio do Aberto das Estrelas.

 

Para Cochikeiros esta foi unha xornada “rara”, o mundo ao revés, na que os mellores palanadores da liga non conseguían clasificarse para a rolda final mentres os que estaban a facer unha liga máis irregular eran os que se clasificaban aínda que non conseguían pasar da primeira eliminatoria e iso que algún ben que o tivo fácil. Pero espectacular si que foi a xornada matinal, iso si, se estiveramos nun circo, pois a actuación dos palanadores e palanadoras no concurso de mates foi do máis divertido que ocorreu neste día. E do concurso de varados xa non falemos, pois para mandar dun golpe a billarda ata o varal primeiro hai que darlle.

 

Neste día botouse de menos a Viqueira, estrela do equipo tanto nos cartaces coma no campo, que debeu predicir o que podía pasar ao conxunto do equipo que para non dar vergoña antes preferiu ir papar unha lamprea que facer a prea. Tamén Antón, a fichaxe estrela do equipo, xa amagou durante a semana, sen ningún motivo, con non participar. Tras a súa discreta actuación matinal despois de xantar e, iso si, co bandullo ben cheo abandonaba ao conxunto do equipo xustificándose cun xesto de suposta humildade, pero máis ben de covardía, de que el non era unha estrela para estar neste Aberto. Irrecoñecible e lamentable tamén estivo a actuación de Berdillo máis centrado en lanzar os foguetes que as billardas. Pero unha das sorpresas foi a clasificación de Alberte que non paraba de chufarse diante dos demais polo que ben contentiño que marchou para a casa, veremos canto lle dura a potra. Quen estivo a punto de pasar de eliminatoria foi Carlinhos, “speaker” do All Star, pero desaproveitou a oportunidade cando quixo facelo bonito coma se estivese no concurso de mates. Tamén estiveron defendendo as cores do equipo Zaida, Verónica (que fixo miles de km. ex profeso para ocasión), Adrián, Isma, as novas palanadoras Mila e Marié e as fichaxes de última hora que dan veteranía ao equipo Gende (pai de Berdillo e Carlinhos) e José Manuel (tío de David Fontán).

 

Pero sen dúbida a estrela do equipo foi un debutante, Mosquera, que demostrou que cando un non lle dá á billarda non é culpa desta nin do palán senón de quen golpea, aínda que tamén ben seguro que tivo consigo o da “sorte do principiante”. Agardemos contar con el e coa súa sorte para vindeiros compromisos deportivos.

 

Neste día quedou demostrado que hai canteira nalgúns equipos da liga, cousa que non pasa no noso, pois unha palanadora moi nova chamada Sheila, unha estrela miúda, pero non das que fan play-back senón das que golpean forte e con xeito a billarda, converteuse na gañadora deste Aberto das Estrelas levando para a casa a enorme cachucha que lle entregou como premio Gende, protagonista do impactante vídeo de promoción do All Star.

 

Como conclusión deste día para o equipo extraemos a seguinte: un gran día no aspecto organizativo e un mal día no deportivo, bueno…regular e… divertido.

 

Para quen non veu a gozar deste día pode informarse do que pasou a través crónica publicada en DIOIVO e elaborada polo compañeiro e rival David Fontán:

http://www.dioivo.eu/deporte/billarda/307-desfile-de-estrelas-en-cerceda-2

 

 

 

 

 

 

 

 

 

Written by aclucernacerceda in: chascos_entroido |
Mar
07
2012
4

Billarda All Stars 2012 Cerceda

Este domingo esperámosvos en Cerceda no aberto de billarda que reunirá as máis grandes estrelas da billarda para desfrutar dunha xornada deportiva e de paparota.
Non é necesario ser un profesional para participar do xogo pero
xa sabes… “dentro de ti hay una estrella , si lo deseas brillará !! ” (B.Osborne)


Ver Billarda AllStars en un mapa más grande

Written by aclucernacerceda in: BILLARDA |
Feb
14
2012
1

Un concerto de Ses moi chasqueante !!

Pois parece ser, e según me dixeron, que este sábado pasado en facebook  ( la gradilocuente plataforma que salvará nuestras vidas) creárase un evento onde se anunciaba un concerto no auditorio da nosa benquerida Ses (máis concertos nooon porfavor! xD ) . A cousa non parecerá tan raro ainda que fose mentira, pois moitas máis hai pola rede de redes; o curioso é que un grupo de fanáticas donde las hai apareceron poralo arriba (poderíase decir bragas en man) e levaron co chasco en toda a boca. Non quedaron sen concerto, as creadoras do chasco derón un concerto acústico versionando a Ses  ben merecido para quen se achegou porali, máis ben para non quedar sen amigas de por vida!

http://www.facebook.com/events/140263872760395/

 

Written by aclucernacerceda in: chascos_entroido |
Feb
13
2012
--

Aparece o primeiro chasco deste antroido

Faciase tardar, e ainda que este ano o espirito dos chascos parece non deixarse ver, apareceu o primeiro  polo campo da feira. Nunha das noites deste fin de semán, e aproveitando a total escuridade na que se ve asumida a praza do centro, alguén (alguns, algunha!?!? ) colocou uns cirios nas farolas e no sitio delas. Nestas noites poidéronse ver estas pequenas luminarias vermellas que máis que alumear , metian algo de acoj**. Ainda hoxe hai quen chegada a noite as prende. Será o mesmo que as puxo ou @s veciñ@s esperando ter algo de lus xa que, dende que sacaron as navideñas e machou a lua chea , non se ve nadiña.

Written by aclucernacerceda in: chascos_entroido |
Feb
08
2012
--

Antroido de Cerceda 2012

Un ano máis, A.C. Lucerna encárgase de levar adiante  o Antroido d@s veciñ@s de Cerceda. A cita é o sábado 25 de febreiro ás 16h no campo da feira. Como ven sendo tradición antroideira,  o Choqueiro será enxuizado, apresado e queimado; deixandonos os seus bens e unha boa paparota. Recorda que ademais, o sábado anterior o Choqueiro apresentarase ás xentes da vila e estará toda a semana, ata o día do Antroido, de bares e mal faceres.

Vente o Antroido de Cerceda, a tua festa!

Written by aclucernacerceda in: ANTROIDO |

Powered by WordPress | Aeros Theme | TheBuckmaker.com WordPress Themes