Estadísticas da Billarda
Despois de disputarse a 6ª xornada o equipo chega á metade da liga acadando o segundo posto na clasificación da Conferencia Noroeste. Apalpábase no ambiente que algo grande podía pasar este domingo pois por primeira vez en toda a tempada acudiu o equipo ao completo a unha convocatoria na que as brincadeiras foron a mellor táctica de xogo. Non se sabe moi ben a que se debeu tal ansia e entrega por xogar nunha desapracíbel tarde pero na que o bo humor foi a mellor ferramenta para escorrentar o frío. Os palanadores foron recibidos no Parque de Santa Margarida na Coruña, no que estaba previsto xogar, por unha intensa choiva polo que algúns nin baixaron do coche, non vaia ser que encolleran ao mollarse. Alí xa estaban a facer o quecemento a parella billardeira formada por Alberte e Zaida que ben seguro xa estiveron de noite a ensaiar a táctica. Mentres todos os palanadores e palanadoras dos equipos participantes agardaban a que escampase, a choiva tornouse en saraiba polo que, xa que non trouxeran as billardas adecuadas para xogar nesas condicións tan extremas, tomouse a decisión de buscar unha pista cuberta e finalmente tiveron que cruzar a ría para ir xogar a Perillo (Oleiros).
Nesta xornada Cochikeiros conseguiron por segunda xornada consecutiva poñer a un palanador nunha semifinal. Berdillo, con algo máis de sorte que de precisión e bo xogo, colocouse ás portas da final sendo apartado da pista polo imparábel xogo da campioa do aberto, Geni de Roteiros. Estas semanas vai ter choio pois ten que facer unha nova billarda xa que escachou a que tiña, non se sabe se dunha hostia que lle deu ou seguramente dun “billardazo” producido polo impacto dunha billarda doutro palanador, dúbida da que se sairá cando na sección “o que o ollo non ve” do programa Xogo Limpo da RTVCerceda analicen as imaxes do Aberto.
Pero sen dúbida a grande protagonista do equipo nesta xornada, e por méritos propios, é a gran palanadora Zaida. Nunha xornada na que as palanadoras da LNB foron as protagonistas, realizou o mellor aberto da tempada e quedou a un paso da rolda final. Grazas á súa boa actuación é a primeira vez que aporta puntos á clasificación por equipos, decisivos para acadar a segunda mellor puntuación de toda tempada.
E se Zaida foi a cara da moeda nesta xornada, a cruz tocoulle a Alberte. Antes de comezar ,con fachenda estivo a a falar das melloras aerodinámicas que lle introducira á súa billarda: un pintado de cor vermella cun rotulador escolar que tiña pola casa. Logo se lle desinchou o peito despois de que na primeira carreira lle custase bater a billarda. Aconsellámoslle máis humildade e que aprenda de Zaida.
Unha das decepcións foi que Viqueira non pasase á fase final colleitando así o seu peor rexistro da tempada. Esta baixada no seu rendemento preocuparía ao equipo se non fose porque o venres á noite mangouse medio botelo para cear que lle debeu sentar algo forte para o seu delicado estómago e que aínda lle estaba a obrar no bandullo.
Pero se xa non eran poucas as sorpresas, a elas uniuse a de Antón que non saía do seu abraio: Ou meu deus, ou meu deus!; pois conseguía pasar á rolda final desquitando así a pésima actuación da pasada xornada polo que esa noite puido durmir a gusto, sen dores de cabeza. Iso si, foi apeado da nube pola gañadora do Aberto.
A Adrián parece que na casa cantáronlle as corenta e mellorou a súa actitude conseguindo pasar da primeira rolda. Agardemos que esta agardada melloría sirva para meterse entre os doce mellores palanadores ao final da tempada.
O xogo de Isma ben daría para facer unhas apostas ou unha porra pola incerteza do resultado e a pouca lóxica para facer un prognóstico. Nunha xornada abraia co seu xogo e noutra, coma nesta última, parece que é o primeiro día que xoga á billarda. Sen dúbida é o factor sorpresa do equipo.
Carlinhos parece estar xa máis centrado na preparación do Antroido ca na billarda e levou un bo chasco nesta xornada coa súa peor puntuación da tempada. Xunto con Alberte son os dous que menos puntos teñen polo que de non mellorar na vindeira xornada son os candidatos para que un deles sexa investido con todas as honras antroideiras “Choqueiro Cochikeiro”.
Boquete parece aprender moi rápido e discretamente colouse na eliminatoria dos cuartos clasificados de cada grupo o que case lle dá o pase á rolda final. A pesares de non conseguilo quedoulle a satisfacción da louvanza dos membros do equipo por ter feito as agarradeiras de coiro para os paláns. Iso si, para case todos menos para o capitán do equipo. Xa lle vale, que mal lle fixo!!
O optimismo que embriaga aos membros do equipo fai que xa estean a realizar unha achega económica para ir á mercar uns foguetes cos que celebrar unha pronta vitoria nun aberto. Agardemos que de aquí a que chegue o día se non se molle a pólvora.
Visto o que pasa, nada é previsible neste equipo que é, non unha caixa, senón un baúl, ou mellor dito, un “contedor de sorpresas”.
Aberta xa a feira de inverno para novas fichaxes, estase tentando reforzar ao equipo filial, Cochikeiros B, con palanadores e mellor aínda palanadoras que fagan compaña a Boquete que se atopa moi só no equipo.
Lembra que podes colaborar co equipo para axudar a paliar a difícil situación económica pola que atravesa mercando o almanaque no que os palanadores e a palanadora de Cochikeiros posan tal e como viñeron ao mundo… dando a nota!
Podes seguir cada xornada da Conferencia Noroeste en: http://lnb-noroeste.blogspot.com/ e podes ver todos os resultados de todas as conferencias en: http://todolnb.blogspot.com/
Coñece tamén o que pasa en todo o país arredor da billarda en: http://ovaral.blogspot.com/
o tro ‘feo’
estaremos no Pabillón de Limeisa do Piñeiro. Indicacións 
